من ده شاعیرم

یازار: محمدرضا خیری فام

     بیر گون قلم گؤتوروب سؤزلری بیر- بیرینین یانینا دوزرک بئیته اوخشار بیر زاد یازدیم. آنجاق نه قدر ایکینجی بئیت و حتی بیرینجی میصرعی قوشماغا یا داها دوغروسونو دئسک یازماغا چالیشیردیم، باجارمیردیم. " نه اولورسا اولسون، نه قدر سورورسه سورسون سؤیو (شعری ) یازیب بیتیرمه لییم" دئدیم. گؤزونوز یامان گون گؤرمه سین ظولم- شاخسئیله شعری یازیب، بیتیردیم. او گون، گونشین دوغماسینا یامان تله سیردیم. آخی نئچه ساعات اوزرینده چالیشدیغیم شعری بیریسینه اوخومالی ایدیم.

     آرتیق او شعری یازماقلا اؤزومو، تانیدیغیم بوتون سؤیچولردن (شاعیرلردن ) اوستون بیلیب، اؤزومه و شعریمه چوخ- چوخ گوونرک، سؤیو اوخولدا دوستلاریما اوخودوم. اونلار ایسه " چوخ گؤزلدیر" دئدیلر. شعریمین گؤزل، گوجلو و دوزگون اولدوغونو دوشوندویومدن شعر یازماغا داها دا ماراقلاندیم. بیر گون تورکجه سؤیلریمدن بیریسینی یازین (ادبیات ) اؤیرتمنینه اوخودوم. او ایسه سؤیو بیندییینه گؤسترگه اولاراق باشینی ترپدیب، بئله دئدی:

 - شعرین پیس ده ییلدی. آمما بئیت دومون میصرع اولینده....

     او گونلردن اوزون ایللراؤتوب و من بو گون اؤزومه، صینیفداشلاریما و او اوخومامیش اؤیرتمنه  یازیغیم گلیر. او شعرلری و او گونلری آندیقدا گولمه ییم گرکلیدی یوخسا آغلاماغیم؟ اونلار 5-4 یازینسال (ادبی ) سؤزو اؤزو ده هله عیبه جر شکیلده قوللاندیغیما گؤره منی شاعیر سانیردیلار. من ده فارس ادبیاتیندان باشی چیخانلارا یالنیزجا تورکجه سؤیلریمی اوخویوردوم.

     ایندی ندنسه بعضی سؤیلری اوخودوقدا او گونلری آنیرام. من اوشاقلیق دونیامدا، بیلمه دن اؤزومو و بیر صینیفی، بئله شعرلری یازان بؤیوکلر، کیمی آلداتماق ایسته ییرلر؟ سؤیچو اولدوقلارینی دوشونن بئله لری تورک دیلی ایله ادبیاتیندان هئچ بیر زاد بیلمه دیکلرینه باخمایاراق سؤزلری یان- یانا دوزرک سؤی یازدیقلارینی دوشونورلر.

     بونلاردان بیر سیراسی ( داها چوخ اورتا یاشلیلارلا یاشلیلار ) تورک شعریندن و اونون اؤلچولریندن بیر زاد بیلمه دن قزله و کلاسیک فورمالارا سیغیب شمع، پروانه، زولف، روخ و بوکیمی یاد سؤزلری دؤنه- دؤنه گونوموزه عایید اولمایان یوروجو و بایاتیمیش شعرلرینده گتیریرلر.

     بیر سیراسی ایسه ( داها چوخ گنجلر ) اؤزلرینی قاباقجیل، آیدین و یئنیچی سؤیچو کیمی آپارماق اوچون، کلاسیک لریمیزی هئچ اوخومادان و دیلیمیزله دوغرو- دوزگون تانیش اولمادان سربست شعره سیغیب، اوندان- بوندان ائشیتدیکلری نئچه تورک سؤزونو یئرلی- یئرسیز قوللانیرلار.

     بو ایکی دسته ده یئرله شن شاعیرجیک لرین بیر سیراسی کلاسیک لریمیزی، باشقالاری ایسه چاغداش شاعیرلریمیزی یانسیلاماغا چالیشیرلار. اؤرنه یین اونلو سؤیچوموز شهریارین حیدربابا سینا یازیلان تایلیقلارین (نظیره لرین ) سایینین 300- دن آرتیق اولدوغونو سؤیله ییرلر. بو کیمی سؤیلرین بیر سیراسینی چیخساق قالانی دیرسیز سؤیلردیرلر. کیمیلری ایسه اونلو شاعیرلریمیزه توخونوب تخریب یولونو سئچه رک، اؤزلرینی بؤیوتمه یه چالیشیرلار. دئمک بونلار اؤزلرینی بؤیوک گؤسترمک اوچون بؤیوکلرین چیینلرینه چیخماق ایسته ییرلر.

     نئچه گون اؤنجه اؤیرنجیسل درگیلرین بیریسینده سؤز قونوسو اولان شعرلردن بیریسینی اوخودوم. دوغروسونو ایسته سز شعرین هانسی قالیبده یازیلدیغینی بیلمه دیم. حتی شعر اولوب- اولماماغینا دا قوشقولاندیم. آنجاق شعرین گؤرونتوسوندن یازانین سربست یازماق ایسته دییینی دوشوندوم. شعر چاغداش شاعیرلریمیزین بیریسینین شعرینه چوخ بنزه ییردی. اؤزونو شاعیر، یازیسینی ایسه شعر سانان بو آدام سؤزلری گوبودجاسینا بیر- بیرینین یانینا دوزوب قیریق- قیریق آنلامسیز و آنلاشیلماز تومجه لر ( جومله لر ) یاراتمیشدی. ماراقلیسی بوراسیدیر کی، بئله بیرشعر چاپ اولموشدو.

     کیمسه آنادان یازار یا سؤیچو دوغولماییب. دوزگون یازماق اوچون اوخویوب یازمالیییق آنجاق هر یازی یا سؤیو چاپ ائدیب یا اینترنت صحیفه لرینده سرگیله مک دوزگون بیر ایش دئییل. بو کیمی دیرسیز شعرلرین یاییلماسی زیاندان سونرا ادبیاتیمیزا نه وئره بیلر کی؟

     آمما سون سوز اولاراق بونلاری دئمه لییم:

1- تورک ادبیاتی یالنیز سؤی دئییل.

2- سؤیچولریمیز دیلیمیزی و ادبیاتیمیزی دوزگون اؤیرنمه لیدیرلر.

3- منجه زورلا شاعیر اولماق اولماز. بونا یئترلی یئتنک ( استعداد ) گرکلیدیر.

4- سؤیچو سؤیو ایله تانینیر. باشقالارینی آلچالدیب باسقی ائتمک دوغرو بیر ایش دئییل.

5- سؤی یالنیزجا دوزمه سؤز یوخ، سوزمه سؤز ده اولمالیدیر.